البنك التجاري و اقسام العمل به و البنوك الاخري

ايه هى أقسام البنوك ؟! 

ببساطة و بشرح مختصر هنتعرف على بعض أقسام الفروع الرئيسية فى اى بنك و كل قسم بيشتغل ازاى.

أولاً : قسم الخزينة " Treasury Department " 

من أهم الأقسام وبيعتبر القلب بالنسبة لدورة عمليات البنك ومن أكتر الأقسام نشاطاً علشان بيرتبط بالتعامل مع العملاء أو الجمهور و بيقضي المصلحة الحقيقية اللي هما جايين عشانها و اللي هى ( السحب أو الإيداع ) بمختلف صورهم.

قسم الخزينة بيتكون من الصرافين (Teller) و رئيس الصرافين (Head Teller) و بيساعده في الشغل نائب أو وكيل.

الصرافين بيكونوا هما المسؤولين عن الخدمات المالية بالكامل في البنك من سحب و إيداع أو تغيير عملة أو تحويل أموال و اي شيء بيتعلق بالفلوس أما رئيس الخزينة بيكون هو المسؤول عن الخزينة الرئيسية اللي في البنك.

 و هو اللي بيطلع العهدة للصرافين و بيستلمها آخر النهار و بيبقى معاه نائب أو وكيل مسؤول عن الخزينة تطيبقاً لمبدأ الرقابة الثنائية.

ثانياً : قسم العمليات المصرفية " Operations department " 

قسم من أهم أقسام البنوك وبيسموه مطبخ البنك جزء من شغل القسم دة بيبقى مع العملاء وجزء من شغله بيبقى مع باقى إدارات البنك واغلبيتها مع إدراة الائتمان الشخص اللى شغال فى القسم دة بيبق المسؤول عن ظبط حسابات الفرع كلها .

من حيث فلوس داخلة أو فلوس خارجة و تنفيذ القيود الداخلية علي السيستم و تنفيذ عمليات المقاصة للشيكات و متابعة حركة الكمبيلات و تحصيلها.

ثالثاً : قسم خدمة العملاء " Customer service "

القسم ده اللي بيستقبل العميل اول ما بيدخل البنك و بيشوف طلباته و بينفذهاله بمعني إنه لو عميل جديد و عايز يتعامل مع البنك في مجال معين بيقوم منفذله طلباته و يحاول يستدرجه للتعامل مع البنك.

 في كل شغله يعني لو تاجر يفتحله حساب جاري و يحاول يجذب ودايعه اللي بره و يعمله كريدت كارد و كده و دي حاجه بيسموها Cross Selling يعني تبيع لواحد حاجه من خلال حاجه تاني .

و في بنوك بتعمل قسم جوه خدمه العملاء بيختص بالعملاء ال VIP في الفروع اللي فيها عملاء تقال لأن العملاء دول مش هيستنوا مع العملاء العاديين و بيبقي في واحد رئيس لقسم خدمة العملاء كله اسمه (Head Customer service).

رابعاً : قسم الائتمان " Credit department "

يعنى ايه ائتمان؟! 

الائتمان هو الثقة اللى بيديها البنك لشخص أو لشركة بأن البنك يديله مبلغ من المال (قرض) يستخدمه لغرض محدد فى خلال فترة زمنية متفق عليها وبشروط معينة فى مقابل فايدة او عائد مادى متفق عليه وبضمانات للبنك ان القرض يرجعله فى حالة ان العميل مسددش اللى عليه .

القسم ده بيتم فيه دراسة القروض ومنحها للأفراد أو للشركات المختلفة زى  المشروعات الصغيرة والمتوسطة و اللى بيشتغل فى القسم دة شغله فى جانب منه للتسويق بمعنى بيبقى مطلوب منه انه يجيب شركات حجم تعاملتها كبير.

 وتكون اخطاها ثابتة مش بيحصل ليها مشاكل وبيبدأ يحاول إنه يقنع الشركة دى إنها تاخد تسهيل على حجم تعاملاتها .

من البنك دة طبعاً بعد دراسة القوائم المالية للشركة لكذا سنة فاتت ويبدأ يشوف الشركة دى ممكن تاخد تسهيل فى حدود اد ايه ويبدأ بكتابة مذكرة ائتمانية عن الشركة دى والمذكرة دى بتبدأ تتعرض على مدير الفرع علشان يكمل إجراءات الموافقة على القرض .